Azərbaycanın 200 manatlıq pul nişanı “Ən yaxşı dizayn və mühafizə sistemlərinə malik banknotlar” üzrə nominasiyasında təqdim edilib

17:07 - 31.05.2018


31 may, Fineko/abc.az. Azərbaycan Mərkəzi Bankı (AMB) Dallas şəhərində keçirilmiş beynəlxalq konfransda yeni pul nişanının geniş təqdimatını keçirib.

AMB-in məlumatında deyilir ki,  təqdimat 23 may tarixində Bakıda keçirilmiş təqdimatla eyni gündə keçirilmişdir.

“Ümumilikdə 70-dək mərkəzi bankdan və 150 beynəlxalq təşkilatdan 750 nümayəndənin iştirak etdiyi konfransda 200 manatlıq pul nişanı ilə yanaşı bir sıra ölkələrin, o cümlədən Avstraliya, İsrail, Meksika, Rusiya, Qırğızıstan və Madaqaskarın yeni seriya banknotları da təqdim olunmuşdur”, - məlumatda belə deyilir.

Həmçinin qeyd edilir ki, Azərbaycan manatı təqdim olunmuş 30 banknot içərisində ən yaxşı beş banknotdan biri kimi qiymətləndirilmişdir və gələn il Dubayda keçiriləcək beynəlxalq Nağd Pul Konfransında “Ən yaxşı dizayn və mühafizə sistemlərinə malik banknotlar” üzrə nominasiyasında təqdim edilməsi üçün təsdiqlənmişdir.

 

 


Bütün xəbərlər