Mərkəzi Bankın notları şirkətlərə 9,5 faiz gəlir qazandırıb

14:25 - 25.05.2023


25 may, Fineko/abc.az. Mərkəzi Bankın notlarının alış və satışına hüquqi şəxslərin də çıxışının təmin edilməsi şirkətlərin vəsaitlərini daha düzgün saxlamasına imkan yaradıb.

Ekspert İntiqam Səfərəliyev açıqlamasında Mərkəzi Bankın notlarının hüquqi şəxslərə 9,5 faiz gəlir qazandırması barədə danışıb. 

Bildirib ki, manatın emitenti olan Mərkəzi Bank, eyni zamanda, nominal dəyəri 10 min manat olan notların da emissiyasını həyata keçirir: “Manata və notlara maliyyə aktiv qismində yanaşdıqda, notların manatdan bir neçə fərqi var. İlk olaraq qeyd etmək lazımdır ki, manatı banklar vasitəsilə almaq və satmaq, eyni zamanda, notları investisiya şirkətləri vasitəsilə almaq və satmaq mümkündür. Manat müddət ərzində şirkətlərə heç bir gəlir yaratmır. Notlarda vəsaitin saxlanılması isə hüquqi şəxslərə illik 8-9,5 faiz gəlir qazandırır. Notların tez-tez alınıb satılmasından aylıq 2-3 faiz gəlir əldə etmək mümkündür. Notların müddəti var və həmin müddətin son tarixində Mərkəzi Bank hər bir not üçün 10 min manatı not sahibinin hesabına köçürür”.

İ.Səfərəliyev əlavə edib ki, Mərkəzi Bank hər həftə 120 milyon manatlıq notları hərrac yolu ilə satır. Mayın 18-də keçirilmiş hərracda 9 aylıq notlar ən ucuz qiyməti 9377 manat olmaqla satılıb.

Bütün xəbərlər