13:59 - 26.05.2023

---

26 may, Fineko/abc.az. Bildiyiniz kimi, zavod buraxılış tarixinə görə yaşı 10 ildən çox olan minik avtomobillərinin Azərbaycan ərazisinə gətirilməsi məhdudlaşdırılır. Bu, Nazirlər Kabinetinin 29 mart 2023-cü il tarixli qərarında əksini tapıb. 

Bəs görəsən qərar avtomobil bazarına necə təsir edib?

Bu sualla ekspert Aslan Əsədova müraciət etdik.

Ekspert ABC.AZ-a açıqlamasında bildirdi ki, qərardan sonra qiymət artımı gözlənilən idi və proqnozlaşdırılırdı:

"Bu gözləntilər və proqnozlar özünü doğruldub.. Çünki belə hallardan istfadə edərək bəzi işbazlar qiymət artmına gedir. Xüsusilə də insanlarda belə bir fikir formalaşdırmağa çalışırlar ki, qiymətlər çox qalxacaq. Hətta elə avtomobillərdə qiymət artımı müşahidə edilir ki, bir neçə il bundan öncə 30 faiz ucuz idi. Ancaq indi bahalaşıb. Bu il qərarın verildiyi müddətdən indiyədək olan bahalaşmaya gəldikdə, bahalaşma mövcuddur. Yaxın gələcəkdə bu artımın yenə də baş verməsini gözləyirəm. Ancaq bu artım müəyyən həddə qədər olacaq. Çünki yeni avtomobillər gəldikcə, yəni avtomobil gətirən şəxslər daha ucuz, iri ciplərin gətirilməsinə təşəbbüs göstərəcəklər. Yəni mənbəni dəyişəcəklər. Ona görə də bu artım tədricən stabilləşəcək və dayanacaq”. 

Ekspert hesab edir ki, qərardan sonra hazırki avtomobil bazarında canlanma yaranmalı idi.

"Ancaq tədricən köhnələrin köhnə, təzələrin isə təzə qiyməti olacaq. Bu ildən təzə gələn avtomobillərlə bağlı oturuşmuş bir sistem olacaq. Qiymətlərdə bir neçə il ərzində enmə ola bilər. Burada hökumətin atdığı addımlar da önəmli ola bilər. Çünki yaxın gələcəkdə avtomobillərin rüsumlarına, qiymətlərinə baxıla bilər", - deyə ekspert A.Əsədov bildirib.

Müəllif: Elmir Murad