14:04 - 30.05.2023

---

30 may, Fineko/abc.az. Bildiyiniz kimi, bir müddət əvvəl Dövlət Gömrük Komitəsi buraxılış ili 10 ildən çox olan avtomobillərin Azərbaycana gətirilməsini qadağan edən qərar qəbul edib. Sözügedən qərardan sonra avtomobil bazarında qiymət artımı müşahidə olunsa da, canlanma, yəni satış azalıb.

Təbii ki, bunun səbəbi qiymətlərin alıcıların cibinə uyğun olmamasıdır.

Məsələ barədə ABC.AZ-a danışan ekspert Elmədddin Muradlı hesab edir ki, hökümətin bu qərarı ölkəyə köhnə avtomobillərin gətirilməsinin qarşısını almağa xidmət edir.

Hökumət hesab edir ki, təhlükəsizlik baxımından bu addım vacibdir deyən ekspertin sözlərinə görə, köhnə avtomobillər ölkəyə gətirildikcə, burada qəzaların sayı artır, ətraf mühit çirklənir və digər problemlər ortaya çıxır:

"Amma, biz bunu bilirik ki, o qərarın verilməsinin müəyyən səbəblərindən biri də avtomobilləşmənin qarşısını almaqdır. Məlumdur ki, ictimai nəqliyyat getdikcə bərbad vəziyyətə düşür, insanlar da yolda qalmamaq üçün məcburiyyətdən maşın almağa önəm verirlər. Problemlərin hamısı da burdan qaynaqlanır. Buraxılış ili 10 ildən köhnə olan avtomobillər ölkəyə artıq gətirilmir. Əlsində bəzi ölkələrdə bu təcrübə olub, bundan istifadə ediblər, müəyyən nəticələr də əldə edilib. Amma, səmimi deyim ki, ictimai nəqliyyat normal vəziyyətdə olsa idi, durum bu həddə gəlib çatmazdı. Ona görə vətəndaşlar məcburən avtomobil alırlar, heç kim artıq pul qazanmır, və ya artıq yerə də pul xərcləmək istəmir. Ümumiyyətlə bu bahalaşma da ondan dolayı yaranıb, bazarda artıq köhnə avtomobillər bahalaşır. Səbəb də odur ki, bu avtomobillərə tələbat var, amma ölkəyə gətirilməsi qadağan olduğu üçün artıq əlçatan deyil. Bazarı da həmişə tənzimləyən alverçilərdir, onlar da bundan istifadə edib, məqsədli formada qiymətləri bahalaşdırır".

Müəllif: Elmir Murad