16:13 - 30.05.2023

---

30 may, Fineko/abc.az. Portuqaliya Kibertəhlükəsizlik Şurası Çin tədarükçülərinin məhsullarının ölkənin simsiz şəbəkə təhlükəsizliyi üçün “yüksək risk” yaratdığını bildirib.

ABC.AZ xarici mətbuata istinadən xəbər verir ki, burada söhbət Çinə məxsus olan “Huawei” şirkətindən gedir. Hesabata əsasən, Portuqaliya hökuməti sözügedən şirkətinin məhsullarını ölkə üçün kibertəhülkəsizlik baxımından təhdid sayır. Bu səbəbdən ölkədə “Huawei” şirkətinə qadağa qoyub.

“Huawei” sözçüsü mövzu ilə bağlı açıqlama verib:

“Son iyirmi il ərzində “Huawei” simsiz şəbəkələr qurmaq və milyonlarla insanı birləşdirən keyfiyyətli xidmətlər göstərmək üçün Portuqaliya operatorları ilə işləmişdir. Biz bütün qüvvədə olan qanun və qaydalara əməl etməyə davam edəcəyik. Məhsul və xidmətlərimizə güvənən Portuqaliyalı müştərilərə və tərəfdaşlara xidmət göstəririk”.

“Financial Times”ın məlumatına görə, Portuqaliya son illərdə adambaşına ən çox Çin investisiyası alan ölkələrdən biri olub. Belə ki, ölkənin ən böyük simsiz operatorlarından biri olan Portuqaliya Altice 2018-ci ildə “Huawei”in 5G avadanlıqlarından istifadə etmək üçün böyük bir müqavilə imzalayıb.

Yeni qərar təsdiqlənərsə, Portuqaliya da bu yaxınlarda “Huawei” və Çin avadanlıqlarına məhdudiyyətlər tətbiq edən Kanada və Danimarka, İsveç, Estoniya, Latviya və Litva kimi ölkələrə qoşula bilər.