“Azərbaycanda aqro-sənaye holdinqlərinin sığorta ehtiyacı” mövzusunda seminar təşkil olunub

20.09.2018,18:00


20 sentyabr, Fineko/abc.az. Azərbaycan Sığortaçılar Assosiasiyasının (Birlik) və Almaniyanın “Genillard & Co.” Sığorta brokinq və konsaltinq şirkətinin təşəbbüsü ilə “Azərbaycanda aqro-sənaye holdinqlərinin sığorta ehtiyacı” mövzusunda geniş tərkibli seminar təşkil olunub. Seminarda Birliyinsədri Mustafa Abbasbəyli, kənd təsərrüfatı sığortası üzrə ekspert Əli Bayramov, sığorta və təkrarsığorta şirkətlərinin rəhbər şəxsləri və sahə üzrə mütəxəssisləri iştirak edib.

Seminar “Kənd təsərrüfatı istehsalatında risklərin idarə edilməsinin məqsəd və dəyəri”, “Azərbaycan kənd təsərrüfatı sığortasının inkişafı”, “Biznes prosesləri, məlumatların mövcudluğu və məlumatların idarə edilməsi”, “Anket sorğusu və sahə üzrə sorğu”, “Sığorta və təkrarsığorta xidmətləri” kimi mövzuları əhatə edib. Seminar “Genillard & Co.” Şirkətinin İcraçı direktoru Christofer Genillard, İsveçrənin nüfuzlu təkrarsığorta şirkəti “Swiss Re” Təkrarsığorta şirkətinin Vitse-prezidenti Marcel Andriesse, Azərbaycan Respublikasının Kənd Təsərrüfatı Nazirinin məsləhətçisi Drs. Ing. Martis van Splunter tərəfindən aparılıb.

Seminarda “Genillard & Co.” və “Swiss Re”nin əməkdaşları öz nəzəri və praktiki biliklərindən istifadə edərək kənd təsərrüfatı sığortası üzrə risklərin müəyyən edilməsi metodları, məlumatların və risklərin idarə edilməsi, həmçinin, Azərbaycanda kənd təsərrüfatı sığortası mexanizminin tətbiqi və inkişafı, təkrarsığortası kimi məsələlərlə bağlı geniş və ətraflı məlumat verib, təqdimatlarla çıxış ediblər. Seminar daha sonra iştirakçıların mövzu ilə bağlı müzakirələri və fikir mübadiləsi ilə davam edib.Azərbaycanda kənd təsərrüfatı risklərinin əvvəllər sığortalanmaması, bu risklərlə bağlı zəruri məlumatların məhdudluğu xarici təkrarsığorta şirkətlərinin əməkdaşlığı məsələsində müəyyən problemlər yaradır. Ancaq “Genillard & Co.”  Şirkətinin Azərbaycan kənd təsərrüfatı sığortası mexanizminə verdiyi dəstəyin nəticəsi olaraq İsveçrənin nüfuzlu təkrarsığorta şirkəti “Swiss Re” kənd təsərrüfatı üzrə riskləri təkrarsığorta etdirməyə razılıq verib.

Xatırladaq ki, bu ilin əvvəllindən etibarən “Azərbaycanda kənd təsərrüfatı sığortası haqqında” Qanun layihəsi və bunun tətbiq mexanizmlərinin müzakirəsi məqsədilə Birlik nəzdində Maliyyə Bazarlarına Nəzarət Palatası, Kənd Təsərrüfatı Nazirliyi, sığortaçılar və müstəqil ekspertlərdən ibarət işçi qrupunun çoxsaylı görüşləri baş tutmuşdur. Bu müzakirələrin yekunu olaraq “Azərbaycanda kənd təsərrüfatı sığortası haqqında” Qanun layihəsinə bir sıra dəyişikliklər edilmişdir.