Yanvar-avqust aylarında turistlər Azərbaycanda 888 milyon manat xərcləyiblər

01.10.2018,15:26


1 oktyabr, Fineko/abc.az. Xarici vətəndaşların Azərbaycandakı xərcləri ötən ilə nisbətən 26% artıb.

İqtisadi İslahatlar və Kommunikasiya Təhlil Mərkəzinin araşdırmalarına əsasən, yanvar-avqust aylarında Azərbaycana gələn əcnəbilər bank kartları vasitəsilə 888 milyon manat məbləğində əməliyyatlar həyata keçirmişlər.

“Keçən ilin analoji dövrü ilə müqayisədə bu ilin yanvar-avqust aylarında ölkəmizə gələn xarici vətəndaşların və Azərbaycanda vətəndaşlığı olmayan vətəndaşların bank kartları vasitəsilə apardıqları əməliyyatların dəyəri 184 milyon manat və ya 26% artıb. Avqustda ölkəmizə gələn xarici vətəndaşların bank kartları vasitəsilə apardıqları əməliyyatları 141 milyon manat olub və ötən ilin avqust ayı ilə müqayisədə 39% artıb”, - deyə icmalda bildirilir.

Yanvar-avqust  aylarında dünyanın 193 ölkəsindən 1976,9 min əcnəbi Azərbaycana gəlib ki, bu da ötən ilin eyni dövrünün göstəricisindən 8,5% çoxdur.