Oktyabrın 5-nə olan hava haqqında məlumat

04.10.2018,15:01


4 oktyabr, Fineko/abc.az. Bakıda və Abşeron yarımadasında sabah, oktyabrın 5-də hava şəraitinin qeyri-sabit keçəcəyi, güclü şimal-qərb küləyinin əsəcəyi, bəzi yerlərdə arabir yağış yağacağı gözlənilir. Şimşək çaxacağı ehtimalı var. Temperaturun anomal gedişi gözlənilir. Belə ki, havanın temperaturunun Bakıda və Abşeronda gecə müsbət 18-20, gündüz müsbət 16-18, axşam müsbət 14 dərəcə olacağı gözlənilir.

Atmosfer  təzyiqi 760 mm  civə sütunundan 769 mm  civə sütununa  yüksələcək, nisbi rütubət 80-90% olacaq.

Azərbaycanın rayonlarına gəlincə isə, sabah gün ərzində bəzi yerlərdə şimşək çaxacağı, arabir yağış yağacağı gözlənilir. Ayrı-ayrı yerlərdə yağışın leysan xarakterli intensiv olacağı, axşam yüksək dağlıq ərazilərdə qara keçəcəyi ehtimalı var. Qərb küləyi əsəcək, bəzi yerlərdə arabir güclənəcək.

Havanın temperaturu gecə 15-20, gündüz 23-28, dağlarda gecə 6-11, gündüz 11-15 dərəcə isti təşkil edəcək.