16:31 - 21.11.2017

---

21 noyabr, Fineko/abc.az. Azərbaycan Mərkəzi Bankı (AMB) kriptovalyutalara münasibətdə konservativ mövqedədir.

Parlamentdə keçirilən 2018-ci ilin büdcə layihəsinin müzakirəsi zamanı AMB-nın idarə heyətinin sədri Elman Rüstəmov qeyd edib ki, bank, kriptovalyuta və blokçeyn texnologiyalarından istifadə məsələlərini izləyir.

“Azərbaycan Mərkəzi Bankı kriptovalyutalara münasibətdə konservativ mövqedədir. Kriptovalyuta paralel maliyyə monetar sistemi deyil, yüksək riskli investisiya aktividir”, - deyə E. Rüstəmov vurğulayıb.

Onun sözlərinə görə, blokçeyn yaxın beş il ərzində maliyyə sistemini dəyişdirə biləcək qabaqcıl texnologiyadır.

AMB, blokçeyn texnologiyasını maliyyə və bank sektorlarında tətbiq etməyə kömək edəcək. Bank artıq aparıcı konsaltinq şirkətləri ilə danışıqlara başlayıb.