Sahibkarlar ilin sonunadək 4 beynəlxalq sərgidə vahid ölkə stendi ilə iştirak edəcəklər

06.08.2019,11:42


6 avqust, Fineko/abc.az. İlin sonuna kimi növbəti 4 beynəlxalq sərgidə vahid ölkə stendi ilə iştirak nəzərdə tutulur.

Bu barədə Azərtaca-a verdiyi müsahibəsində İqtisadiyyat naziri Şahin Mustafayev deyib.

Nazir qeyri-neft məhsulları ixracının stimullaşdırılması məqsədilə “Made in Azerbaijan” brendinin təbliği ilə bağlı dəstək tədbirlərinin həyata keçirildiyini, dövlət vəsaiti hesabına sahibkarların ixrac missiyalarında, beynəlxalq sərgilərdə iştirak etdiklərini deyib.

Bildirib ki, bu il ərzində ixracatçıların Almaniyada keçirilən “Beynəlxalq Yaşıl Həftə”, “Fruit Logistika” və “Prowein”, Rusiyada “Prodexpo” və “Mosbuild”, Birləşmiş Ərəb Əmirliklərində “Qulfood”, Çində “Sial China” dünya miqyaslı beynəlxalq sərgilərində sahibkarlarımız vahid ölkə stendi ilə iştirak ediblər. İlin sonuna kimi növbəti 4 beynəlxalq sərgidə vahid ölkə stendi ilə iştirak nəzərdə tutulur. Bununla yanaşı, 6 ay ərzində ixracatçıların 17 beynəlxalq sərgidə fərdi qaydada iştirakına dəstək göstərilib.