SOCAR və "Baker Hughes" arasında bir sıra sənədlər imzalanıb

12:28 - 10.12.2019


10 dekabr, Fineko/abc.az.  Bu gün Bakıda  keçirilən "Energy Forward” tədbirində Azərbaycan Dövlət Neft Şirkəti (SOCAR) və "Baker Hughes" beynəlxalq şirkəti arasında bir sıra sənədlər imzalanıb.

İlk sənəd yuxarı axın əməliyyatlarında səmərəli quyuların konsepsiyasının işlənib hazırlanması və icrası ilə bağlı anlaşma memorandumudur. Bu layihənin əsas məqsədi yeni quyularda səmərəliliyin artırılması imkanlarının müəyyən olunması və əldə edilməsidir. "Baker Hughes" şirkətinin qabaqcıl texnoloji həllərinin tətbiqi Azərbaycanın neft və qaz sənayesində inkişafa dəstək olmaqla, yerli resurslar və imkanlardan daha səmərəli istifadəyə şərait yaradacaq.

Digər sənəd "Baker Hughes" və SOCAR-ın Neft və Qaz Tədqiqatı və Layihələndirmə İnstitutu arasında imzalanıb və SOCAR-ın Azərbaycanda mövcud qurğusundan səmərəli istifadə əsasında neft sənayesi üçün reagentlərin istehsalını daxildə həyata keçirməyə yol açan razılaşmadır. Qlobal hasilat standartlarını təqdim etməklə, "Baker Hughes" və SOCAR yerli istismar təşkilatlarına ölkə daxilində və Xəzər dənizi regionunda aparıcı layihələrə qoşulmaq imkanı verəcək.

Bundan əlavə, "Baker Hughes", Bakı Ali Neft Məktəbinə JewelSuite proqram təminatı üçün lisenziyanın verilməsi barədə təhvil-təslim aktı imzalanıb. Dəyəri 1 milyon ABŞ dollarından artıq olan bu proqram təminatı üçün lisenziyalar tələbələrə Xəzər hövzəsində yeraltı mürəkkəb quruluşları modelləşdirməyə imkan yaradacaq. Bu təşəbbüs, sənaye sahəsində aparıcı geoloji və geofiziki proqram təminatından istifadə sahəsində real təcrübə qazanacaq, eyni zamanda tələbələrin təhsildən birbaşa peşəkar fəaliyyətə keçidinə dəstək verəcək.

 

© Report.az

 

Bütün xəbərlər