330x110
 

Avtomobilində dərman qutusu olmayanlarla bağlı ekspertdən açıqlama – Detallar

07.09.2020,15:27


7 sentyabr, Fineko/abc.az. Avtomobilində dərman qutusu olmayan sürücülərin cərimələnəcəyi ilə bağlı məsələ yenidən aktuallaşıb.

ABC.AZ-ın məlumatına görə, məsələ ilə bağlı yol hərəkəti üzrə ekspert Ərşad Hüseynov bir sıra nüanslara toxunub.

O qeyd edib ki, 19 iyun 2020-ci il tarixdə Həm “Yol hərəkəti haqqında” qanuna, həm də İXM-ə dəyişiklik edilərək avtomobillərdə olması zəruri hesab edilən bu qutunun adı dəyişdirildi. "İndi o “dərman qutusu” yox, “ilk tibbi yardım qutusu” adlanır.

Səbəb odur ki, bu qutunun içərisində dərman vasitələri yox, sadəcə həkiməqədərki yardımda istifadə edilə biləcək tibbi ləvazimatlar (qanaxmanı dayandırmaq, yaranı sarımaq üçün və s.) olmalıdır.

Hazırda həmin qutunun tərkibi AR Nazirlər Kabinetinin 2019-cu il 9 sentyabr tarixli 399 nömrəli Qərarı ilə təsdiq olunub, lakin “Yol hərəkəti haqqında” qanuna yuxarıda qeyd etdiyim dəyişikliyin qüvvəyə minməsi ilə əlaqədar NK-ya tapşırıq verilib ki, uyğun düzəlişlər edilsin. Yəqin ki, Nazirlər Kabineti 2019-cu il 9 sentyabr tarixli 399 nömrəli Qərarına dəyişiklik edəcək və sadəcə bu qutunun adını dəyişməklə kifayətlənməyərək, hazırda onun içərisində olması nəzərdə tutulan dərman vasitələrini siyahıdan çıxaracaq” deyə ekspert qeyd edib.

Elmir Murad