Yanvar ayı ərzində Azərbaycan sığortaçıları 83 milyon manata yaxın sığorta haqqı topladı

21.02.2018,16:59


21 fevral, Fineko/abc.az. Azərbaycanın sığorta şirkətləri yanvar ayında 82,8 mln. manat məbləğində sığorta haqqı toplanmış,  sığorta ödənişi isə 23 mln. manat məbləğində olmuşdur.

Maliyyə Bazarlarına Nəzarət Palatasından verilən məlumata görə, ölkədə 21 sığorta şirkəti fəaliyyət göstərir.

“Könüllü sığorta bazarı üzrə haqlar 71,9 mln. manat, ödənişlər isə 18 mln. manat təşkil etmişdir. İcbari sığorta bazarı üzrə haqlar 10,9 mln. manat, ödənişlər isə 5 mln. manat olmuşdur”, - məlumatda belə deyilir.

Məlumatda deyilir ki, sığorta haqlarının 87%-i könüllü, 13%-i isə icbari sığorta növlərinin payına düşmüşdür. Sığorta ödənişlərinin 78%-i könüllü, 22%-i isə icbari sığorta növlərinin hesabına formalaşmışdır.