“Kapital Bank” rəsmisi: “Mobil POS xidməti nağdsız ödənişlərin inkişafına müsbət töhfə verəcək”

11:54 - 27.04.2022


27 aprel, Fineko abc.az.  Bir neçə gün əvvəl “Kapital Bank” ASC hüquqi şəxs və fərdi sahibkarlara Azərbaycanda ilk dəfə yeni “Mobil POS” xidmətini təqdim etdi. Yeni layihə ölkədə nağdsız ödənişlərin artırılmasına, həmçinin rəqəmsal bank xidmətlərinin inkişafına müsbət təsir edəcək. Layihənin özəllikləri, üstünlükləri, tətbiqi barədə olan məqamlara aydınlıq gətirmək üçün Bankın KOS və korporativ bankçılıq sahəsinin lideri Heydər Süleymanovdan müsahibə aldıq.

- Heydər müəllim, yeni təqdim edilən Mobil POS xidmətinin əsas üstünlükləri nədən ibarətdir?

- “Kapital Bank”ın İqtisadiyyat Nazirliyi yanında Dövlət Vergi Xidməti və “Visa” şirkəti ilə birgə təqdim etdiyi bu xidmət vasitəsilə artıq sahibkarlar ənənəvi POS-terminal əvəzinə kartlardan, ağıllı saatlardan, stikerlərdən və digər təmassız ödəniş üsullarından ödənişləri smartfonları vasitəsilə qəbul edə biləcəklər. Əgər indiyə qədər nağdsız ödəniş qəbul etmək üçün POS-terminal cihazını əldə etmək və filiala gələrək digər bankdaxili prosedurları yerinə yetirmək lazım idisə, indi artıq tam onlayn formada müraciət edib, smartfonu POS-terminal cihazına çevirmək olar. “Visa Tap to phone” texnologiyası əsasında işləyən bu xidməti

“IBA Group” beynəlxalq İT şirkəti hazırlayıb. Əminəm ki, “Mobil POS” xidməti nağdsız ödənişlərin inkişafına müsbət töhfə verəcək. 

- Yeni xidmət əsasən kimlər üçün nəzərdə tutulub və “Mobil POS”a qoşulmaq üçün hər hansı bir xüsusi şərtlər varmı?

- Əsasən ticarət və xidmət sektorunda fəaliyyət göstərən kiçik sahibkarlar – bərbərlər, dərzilər, kuryerlər, taksi sürücüləri, ayaqqabı təmiri ilə məşğul olanlar, köşk sahibləri, qida sektorunda çalışanlar, kiçik ticarət, meyvə-tərəvəz satanlar və digər şəxslər bizim əsas hədəf kütləmizdir. Bu yeniliyi tətbiq etməklə əlavə POS-terminal qurğusunu əldə etməyə, həmçinin onun daşınmasa ehtiyac yoxdur. İlkin mərhələdə xidmətdən yararlanmaq üçün “Kapital Bank” müştərisi olmaq mütləqdir. Xidmətə qoşulmaq üçün “Kapital Bank” filiallarına gəlmədən, “Müştəri Bank” mobil tətbiqi vasitəsilə onlayn formada tam olaraq pulsuz qeydiyyatdan keçmək olar. “Mobil POS” vasitəsilə ödəniş qəbul etmək və həmçinin, əməliyyat tarixçəsinə və mövcud “Mobil POS” terminallarının məlumatlarına baxmaq olar. Bundan başqa “Android” əməliyyat sisteminə məxsus və NFC modulu dəstəkləyən smartfona sahib olmaq lazımdır.  

- “Mobil POS”la ödəniş etdikdən sonra alıcılara qəbz təqdim edilirmi?

- Təbii ki, qəbz təqdim edilir. Bunun üçün 3 üsul mövcuddur: müştəri mobil nömrəsini və yaxud elektron poçt ünvanını satıcıya təqdim etməklə, həmçinin ödəniş etdikdən sonra yaradılan xüsusi QR-ı skan etməklə elektron qəbzi telefonunun yaddaşında saxlaya bilir. 

- Bəs sahibkarlar bu xidmətə “Müştəri Bank”dan necə qoşula bilərlər?

- Xidmətə qoşulmaq üçün “Müştəri Bank” mobil tətbiqindən şirkətin və istifadəçilərin müvafiq məlumatlarını qeyd etdikdən sonra, sifarişi “ASAN İmza” vasitəsilə səlahiyyətli şəxs imzalamalıdır. Qoşulma tamamlandıqdan sonra bu haqda səlahiyyətli şəxsə e-mail və bildiriş göndərilir. 

“Müştəri Bank” vasitəsilə rahat və təhlükəsiz şəkildə bir sıra xidmətlərdən istifadə etmək mümkündür: təcili köçürmələr, büdcə ödənişləri, cari hesabın tam onlayn şəkildə açılması, əməkhaqqı layihəsinə qoşulma, əməkhaqqı kartlarına mədaxil, əməkhaqqı kartlarının sifarişi və çatdırılması biznes və sahibkar kartlarının sifarişi, ölkə daxili və ölkə xarici nağdsız köçürmələr, konvertasiya əməliyyatları, hesablara nəzarət, çıxarışların əldə edilməsi, sərəncamlar haqqında məlumat, QR vasitəsilə nağdlaşma, Kliklə ödə xidməti, onlayn kredit məhsulları sifarişi – overdraft, kredit, qarantiya, sürətli tender və s. “Müştəri Bank”a qoşulmaq üçün https://cb.kapitalbank.az/login linkinə keçid etmək və yaxud (012) 310 09 99 nömrəsi ilə əlaqə saxlamaq kifayətdir. Sistemlə həyata keçirilən bütün köçürmələr zamanı 25%-ə qədər güzəşt əldə etmək mümkündür. 

Bütün xəbərlər