12:15 - 15.11.2017

---

Mustafa Abbasbəyli Caspian European Club-un yeni baş icraçı direktoru təyin edilib. Bu barədə Caspian European Club və Caspian American Club-un sədrinin birinci müavini Telman Əliyev məlumat verib.

Telman Əliyev qeyd edib ki, Mustafa Abbasbəyli uzun illər Caspian European Club-un hüquq komitəsinə, gömrük və vergilər komitəsinə rəhbərlik edib.

“O, biznes problemlərinin tədqiqində, həmçinin bizim Azərbaycan Respublikasının Prezidenti, Caspian European Club və Caspian American Club-un Sədri İlham Əliyevə və Azərbaycan Respublikasının Birinci vitse-prezidenti Mehriban Əliyevaya ünvanladığımız bütün təkliflərin hazırlanmasında fəal iştirak edib”, - deyə Telman Əliyev qeyd edib.

Mustafa Aslan oğlu Abbasbəyli 1980-ci ildə Gəncə şəhərində anadan olub. 2000-ci ildə Xəzər Universitetini bitirərək “Beynəlxalq hüquq” ixtisasına yiyələnib. 2001-ci ildə “Türk dili” ixtisası üzrə Egey Universitetini, 2003-cü ildə Ankara Universitetini “Özəl hüquq” ixtisası üzrə bitirib. 2009-cu ildə Azərbaycan Milli Elmlər Akademiyasında dissertasiya müdafiə edərək hüquq elmləri üzrə fəlsəfə doktoru elmi dərəcəsini alıb.

Maliyyə sahəsi üzrə bir çox şirkətlərdə rəhbər vəzifələrdə çalışıb. Hazırda “Beyli Group” şirkətinə rəhbərlik edir. Eyni zamanda Azərbaycan Dövlət İqtisad Universitetində dosent kimi çalışır. Azərbaycan Respublikası Vəkillər Kollegiyasının və Beynəlxalq Vəkillər Assosiasiyasının üzvüdür. 50-dən artıq elmi işin, həmçinin 3 kitabın müəllifidir.

Caspian European Club 2002-ci ilin iyununda Xəzər-Qara dəniz regionunda fəaliyyət göstərən nəhəng neft-qaz şirkətlərinin dəstəyilə yaradılıb. Caspian European Club və Caspian American Club-un Sədri Azərbaycan Respublikasının Prezidenti Zati-aliləri cənab İlham Əliyevdir.

Yarandığı ilk gündən Caspian European Club neft sahəsindən əldə olunan gəlirlərin qeyri-neft sektoruna cəlb olunmasına yardım edir. Sıralarında 5 mindən artıq şirkət və təşkilatı birləşdirən Caspian European Club dünyanın 50 ölkəsində fəaliyyət göstərir, dövlət qurumları ilə özəl sektor arasında dialoqun dəstəklənməsi istiqamətində fəal iş aparır.