Bakıda Xəzəri ən çox çirkləndirən istirahət mərkəzləri – SİYAHI

15:38 - 5.03.2020


5 mart, Fineko/abc.az. Səbail rayonunda Xəzəri ən çox çirkləndirən istirahət mərkəzlərinin adları açıqlanıb.

ABC.AZ xəbər verir ki, bunu Ekologiya və Təbii Sərvətlər Nazirliyinin Xəzər Kompleks Ekoloji Monitorinq İdarəsinin əməkdaşı Nərmin Babaşova deyib.

O qeyd edib ki, Səbail rayonu ərazisində Xəzəri ən çox çirkləndirən ərazilər 20-ci sahə, Badamdar və Bayıl qəsəbələrində qeydə alınıb.

Onun sözlərinə görə, Binəqədi və Səbail rayonlarının Xəzər sahili ərazilərində keçirilən monitorinqlər zamanı bu ərazilərdəki “Mambo Beach Hotel”, “Xəzər”, “Dəniz”, “Dərya” istirahət mərkəzlərində və ətrafdakı yaşayış massivlərində formalaşan tullantı sularının mərkəzləşdirilmiş kanalizasiya şəbəkəsinə qoşulmaması səbəbindən təmizlənmədən dənizə axıdıldığı məlum olub.

İdarə rəsmisinin sözlərinə görə, son illər yaşayış massivlərinin genişlənməsi isə təmizlənməmiş tullantı sularının həcminin artması ilə nəticələnib: “Binəqədi rayonunda da vəziyyət eynidir. Rayonun Xocəsən qəsəbəsində yerləşən "Golden Water" və "El Babtürk" MMC-lərdə, "Bərəkət 98" firmasında və digər müəssisələrdə, eləcə də yaşayış massivlərində əmələ gələn tullantı suları da təmizlənmə prosesi keçmədən Xocəsən gölünə, oradan da dənizə axıdılır. Keçirilən monitorinqlərin və aparılan analizlərin nəticəsi bunu deməyə əsas verir ki, sözügedən obyektlərdən dənizə axıdılan tullantı sularda kimyəvi və bioloji çirkləndiricilərin miqdarı normadan çoxdur."

Müəllif: Elmir Murad

 

Other news