Gömrük Komitəsi ləğv ediləcək?

14:45 - 19.07.2022


19 iyul, Fineko/abc.az. Xəbər verdiyimiz kimi, dünən Prezident İlham Əliyevin imzaladığı sərəncamla Şahin Bağırov Dövlət Gömrük Komitəsi sədrinin birinci müavini təyin edilib. Həmçinin, komitəyə yeni sədr təyin olunanadək həmin vəzifənin müvəqqəti icrası ona həvalə olunub.

ABC.AZ-ın məlumatına görə, bu günlərdə komitənin bir neçə yüksək çinli məmuru həbs edilib. Ardınca sədr Səfər Mehdiyev vəzifəsindən azad olunub. Əvəzində isə qurumda ikinci birinci müavin postu yaradılıb və Şahin Bağırov həmin vəzifəyə gətirilib. O, həmçinin birinci müavin olaraq həm də sədrin səlahiyyətlərini icra edəcək. 

Gömrük komitəsinə sədrin əvəzinə birinci müavin gətirilməsi nəyə hesablanmış addımdır? 

Məsələni Qaynarinfo-ya şərh edən iqtisadçı ekspert Natiq Cəfərlinin fikrincə, sözügedən qərarla Gömrük Komitəsinin ayrıca qurum kimi qalmasının, yaxud da hansısa nazirliyə birləşdirilməsinin daha doğru olub-olmadığı müzakirə edilir:

"Ona görə də Gömrük Komitəsində edilən bu kadr dəyişikliyini keçid dövrü üçün müvəqqəti qərar kimi dəyərləndirmək olar. Bir çox ölkələrdə sözügedən komitə müstəqil qurum olaraq fəaliyyət göstərmir. Maliyyə, İqtisadiyyat və ya Vergilər Nazirliyinin nəzdində fəaliyyət göstərir. Türkiyədə Ticarət Nazirliyinin nəzdində fəaliyyət göstərən departamentdir. Yəqin ki, ölkəmizdə də hansı variant və istiqamətin daha effektli ola biləcəyilə bağlı müzakirələr gedir. Bu müzakirlər bitəndən sonra qurum barədə konkret qərar da veriləcək".

 

Other news