TuranBank ASC-də Baş Direktor vəzifələrinə təyinatlar olub

17:29 - 28.10.2022


28 oktyabr, Fineko/abc.az. TuranBank ASC-də Biznesin İnkişafı və Pərakəndə Bankçılıq üzrə Baş Direktorlar təyin edilib.
Abc.AZ saytının məlumatına görə Pərakəndə Bankçılıq üzrə Baş Direktor vəzifəsinə Rəhman Əliyev, Biznesin İnkişafı üzrə Baş Direktor vəzifəsinə isə Ramil Xəlilov təyin olunub. Məsul şəxs olaraq Rəhman Əliyevə Pərakəndə Bankçılıq, eləcə də Məhsullar və Layihələrin idarə edilməsi Departamentlərinin, Ramil Xəlilova isə İnstitusional Bankçılıq və Marketinq, Hüquq Departamentlərinin, həmçinin Keyfiyyətə Nəzarətin Təşkili Şöbəsinin fəaliyyətləri həvalə edilib.
Məlumat üçün bildirək ki, Pərakəndə Bankçılıq üzrə Baş Direktor təyin edilən Rəhman Əliyev ümumilikdə bank sektorunda 18 illik təcrübəyə malikdir. O,  2004-cü ildən AccessBank-da müxtəlif vəzifələrdə çalışmış, 2013-cü ildən Komisyon Gəlirlərin İnkişafı Departamentinin, sonradan Qeyri-kredit Məhsullarının Satış və Bank xidmətləri Departamentinin direktoru kimi fəaliyyət göstərmişdir. 2020-ci ildən etibarən Rəhman Əliyev fəaliyyətini TuranBank-da davam etdirərək Satış Departamentinin direktoru, 2022-ci ilin fevral ayından sözügedən təyinata qədər isə TuranBank-da Satış üzrə Baş Direktorun müavini vəzifəsini icra edib.
Biznesin İnkişafi üzrə Baş Direktor təyin edilən Ramil Xəlilov ümumilikdə bank sahəsində 10 ildən artıq təcrübəyə malikdir.  O, 2012-ci ildən etibarən TuranBank-da müxtəlif vəzifələrdə çalışmış, 2014-2017-ci illərdə isə Beynəlxalq Əlaqələr və Maliyyə İnstitutları ilə İş Şöbəsinin rəhbəri kimi fəaliyyət göstərmişdir. Qeyd edək ki, Ramil Xəlilov 2017-ci ildən sözügedən təyinata qədər TuranBank-da Biznesin İnkişafı Departamentinin direktoru vəzifəsini icra edib. 
1992-ci ildən etibarən fəaliyyət göstərən TuranBank 19 satış nöqtəsi ilə fərdi və korporativ müştərilərin xidmətindədir. Bankın təqdim etdiyi məhsul və xidmətlərlə bağlı ətraflı məlumatı (012) 935 Məlumat Mərkəzinə zəng edərək,  TuranBank-ın rəsmi veb səhifəsini və ya sosial şəbəkələrdəki (Feysbuk, İnstaqram, və.s) səhifələrini izləyərək əldə edə bilərsiniz.

TuranBank
Bizimlə etibarlıdır…


Вся лента