Süd məhsullarının enən qiyməti oktyabr ayı üzrə FAO ərzaq qiymətləri indeksini zəiflədib

15:30 - 2.11.2017


Oktyabr ayında ərzaq qiymətləri qismən süd məhsulları səbəbindən 2011-ci ildəki rekord qiymət göstəricisindən ortalama 27% aşağı düşüb.

BMT-nin ərzaq və Kənd Təsərrüfatı Təşkilatının (FAO) ərzaq qiymətləri indeksinin orta göstəricisi oktyabr ayı üçün 176,4 % faiz təşkil edib. Bu, sentyabr ayının göstəricisindən 1,3 % aşağı olsa da bir il öncəki göstəricidən 2,5 % çoxdur.

FAO ərzaq qiymətləri indeksi ərzaq səbəti üzrə beynəlxalq qiymətlərdəki aylıq dəyişikliyin göstəricisidir.

Süd məhsulları üzrə FAO qiymət indeksi may ayından etibarən ilk dəfə olaraq bu ay ərzində 4,2 % azalıb.

İdxalçılar Okeaniyadan yeni idxal gözləyərək alışa can atmadığından yağ və süd tozu üzrə beynəlxalq qiymət göstəriciləri oktyabr ayında enib. Eyni zamanda, Avropa Birliyi ölkələrində tələbatın aşağı olması və ehtiyatların həddən artıq çoxluğu da süd tozunun qiymətini aşağı salıb.

İstehsalda müsbət gözləntilər fonunda əsas palma və soya yağının qiymətinin düşməsi nəticəsində bitki yağları üzrə FAO qiymət indeksi sentyabr ayı ilə müqayisədə 1,1 % enib.

Braziliyanın valyutasındakı zəifləmə, AB ölkələrində şəkər çuğunduru məhsulunda gözlənilən artım və  Rusiya Federasiyasında böyük istehsal şəkər üzrə FAO qiymət indeksinin 0,7 % düşməsinə təsir göstərib.

Donuz əti ixracatçıları arasında artan rəqabət və idxala tələbin artmaması beynəlxalq qiymətləri aşağı saldığından ət üzrə FAO qiymət indeksi 0,9 % düşüb.

Buğdanın qiymətinin əsasən aşağı olmasına rəğmən düyünün qiymətinin yüksəlməsi dənli bitkilər üzrə FAO qiymət indeksində 0,4%-lik artıma səbəb olub.

Dənli bitkilər istehsalı yeni rekorda doğru

FAO-nun bu gün nəşr olunan “Dənli bitkilərin tələb və təkifi icmalı”na əsasən, 2017-ci il üçün dünya üzrə dənli bitkilər istehsalının 2016-cı ildəki rekord göstəricini azca ötəcəyi proqnozlaşdırılır.

Cənubi Amerika və Afrikada əkinlərin genişlənməsi səbəbindən dünya üzrə yemlik taxıl istehsalının yeni rekord vuracağı gözlənilir. Əksinə, ABŞ-da məhsulun aşağı olacağı proqnozları fonunda buğda istehsalının azacıq azalacağı proqnozlaşdırılır. Düyü istehsalı həcmi isə, əsasən, stabil qalacaq.

Son FAO hesablamaları gələn il dünya üzrə dənli bitkilərin istifadəsində 1% artım olacağını və 2018-ci il mövsümünün sonunadək dənli bitkilər ehtiyatının yeni rekord göstəriciyə yüksələcəyini bildirir. Düyü və yemlik taxıl üzrə qlobal ehtiyatlarının da yeni rekord vuracağı proqnozlaşdırılır.

Böyük ixrac ehtiyatlarını nəzərə alsaq gələn il əsas ixracatçılar arasında rəqabətin gərgin olaraq qalacağını, buğda ticarətinin gözlənilən zəifləməsi fonunda isə qarğıdalı və düyü üzrə ticarət həcminin artacağını demək olar.

FAO noyabrın 9-da yayacağı “Food Outlook” hesabatında əsas ərzaq əmtəə istiqamətləri barədə ətraflı məlumat verəcək.

Вся лента