Azərbaycan Turizm Assosiasiyası Qadın Sahibkarlığının İnkişafını dəstəkləyəcək

11:21 - 7.12.2018


7 dekabr, Fineko/abc.az. Azərbaycan Turizm Assosiasiyası (AZTA) və Azərbaycanda Qadın Sahibkarlığının İnkişafı Assosiasiyası (AQSİA) arasında Əməkdaşlıq haqqında Memorandum imzalanıb.

AZTA-nın məlumatında deyilir ki, memorandumu AZTA rəhbəri Nahid Bağırov və AQSİA sədri Səkinə Babayeva imzaladı.

“Memorandumun məqsədi Azərbaycanda Qadın Sahibkarlığının İnkişafı Assosiasiyasının Turizm Komissiyasının AZTA ilə əməkdaşlıq əlaqələrinin qurulması, turizm sahəsində qadın sahibkarların fəaliyyətinin təşviqi və dəstəklənməsindən ibarətdir”, - məlumatda belə deyilir.

Məlumatda deyilir ki, imzalanma mərasimi çərçivəsində tərəfər səmərəli əməkdaşlığın formalaşması üçün birgə İşçi Qrupunun yaradılması barədə qərar qəbul etdilər. İşçi qrupunun fəaliyyəti qadın sahibkarların xüsusi təlimlərdə iştirak etməsini təmin etmək, eləcə də, bölgələrə infoturların təşkil edilməsi və yerli əhali arasında kənd turizminin ev təsərrüfatı şəratində inkişafı potensialı haqqında məlumatlandırmaqdan ibarət olacaq.

“AZTA və AQSİA rəhbərləri həmçinin Kiçik və orta biznesin inkişafı  agentliyi (KOBİA) yanında yaradılan İctimai Şura çərçivəsində birgə fəaliyyət və əməkdaşlığın qadın sahibkarların turizm sahəsində fəalliyətinə əlavə dəstək olacağını xüsusi qeyd etdilər”, - məlumatda belə deyilir.

 

Вся лента