Caspian European Club-un CEO-un yeni müavinləri təyin olunub

19.01.2018,16:16


Günay Sadıqova və Eldar Maksumov Caspian European Club-un baş icraçı direktorunun müavinləri təyin ediliblər. Bu barədə Caspian European Club və Caspian American Club-un sədrinin birinci müavini Telman Əliyev məlumat verib.

Telman Əliyev qeyd edib ki, Günay Sadıqova və Eldar Maksumov Caspian Energy-də öz əmək fəaliyyətlərinə 2004-cü ildə başlayıblar və son bir neçə il ərzində Caspian Energy İnternational Media Group, Caspian European Club və Caspian American Club-un baş menecer vəzifələrini icra edirlər.

“13 ildir ki, onlar dövlət qurumları ilə özəl sektor arasında əlaqələrin yaradılmasında fəal iştirak edir və həm Azərbaycanda, həm də onun hüdudlarından kənarda uğurla böyük tədbirlər təşkil edirlər”, - deyə Telman Əliyev söyləyib.

Günay Sadıqova Bakı şəhərində anadan olub, Azərbaycan Dövlət Tibb Universitetini bitirib. Azərbaycan, ingilis, türk, ərəb, ivrit və alman dillərini bilir. Əmək fəaliyyəti dövründə Şimali Amerika və Avropa dövlətlərinin hökumət və özəl sektor nümayəndələri ilə fəal əlaqələr qurub.

Eldar Maksumov Bakı şəhərində anadan olub, Azərbaycan Dövlət Neft Akademiyasını qırmızı diplomla bitirib. Azərbaycan, rus, ingilis və alman dillərini bilir. Əmək fəaliyyəti dövründə MDB, GUAM və Asiya dövlətlərinin hökumət və özəl sektor nümayəndələri ilə fəal əlaqələr qurub.

Caspian European Club Xəzər-Qara dəniz regionunda fəaliyyət göstərən nəhəng neft-qaz şirkətlərinin dəstəyilə 2002-ci ilin iyununda yaradılıb. Caspian European Club-un Sədri Azərbaycan Respublikasının Prezidenti Zati-aliləri cənab İlham Əliyevdir.

Yarandığı ilk gündən Caspian European Club neft sahəsindən əldə olunan gəlirlərin qeyri-neft sektorunun inkişafına yönəldilməsinə yardım edir. Sıralarında 5 mindən artıq şirkət və təşkilatı birləşdirən Caspian European Club dünyanın 70 ölkəsində fəaliyyət göstərir, dövlət qurumları ilə özəl sektor arasında dialoqun dəstəklənməsi istiqamətində fəal iş aparır.

 

Ключевые слова: Caspian European Club