UNEC dünyanın 250 aparıcı universiteti ilə bir sırada

14:17 - 21.02.2018


UNEC Türkiyənin İstanbul şəhərində keçirilən III Avrasiya Beynəlxalq Ali Təhsil Zirvəsində (“EURIE-2018”) təmsil olunub.

70 ölkədən 2500-dən çox təhsil nümayəndəsinın qatıldığı zirvə toplantısında UNEC-i Beynəlxalq Əməkdaşlıq Departamentinin əməkdaşı Turan Süleymanov təmsil edib.

Dünyanın 250 aparıcı ali təhsil müəssisəsinin stendinin yer aldığı “EURIE-2018”də regionun 4 dildə təhsil verən ən böyük iqtisadyönümlü universiteti olan UNEC-in guşəsi sərgi iştirakçılarının xüsusi marağına səbəb olub. Malayziya ali təhsil naziri Idris Jusoh, Avrasiya Universitetlər Birliyinin prezidenti, professor Mustafa Aydın və İstanbul Aydın Universitetinin rektoru, professor Yadigar İzmirli də UNEC-in stendini ziyarət edənlər sırasında olub.

Dünya təhsil bazarında, o cümlədən nüfuzlu beynəlxalq reytinqlərdə Azərbaycanın mövqeyinin əhəmiyyətli dərəcədə yüksəldiyini nəzərə alaraq ölkəmizdə iqtisadyönümlü təhsil almaq istəyən ziyarətçilər UNEC Biznes Məktəbi, Beynəlxalq Magistratura və Doktorantura Mərkəzi, Türk Dünyası İşlətmə Fakültəsi, Beynəlxalq İqtisadiyyat Məktəbinə qəbulla bağlı suallar ünvanlayıblar. Onlar UNEC-ə əcnəbi tələbələrin cəlb olunması istiqamətində həyata keçirilən yeniliklərlə maraqlanıblar.

UNEC stendi digər iştirakçı universitetlərin də diqqətini cəlb edib. Azərbaycan təhsil məkanına inteqrasiya etməyi hədəfləyən dünyanın bir neçə aparıcı universiteti bu istiqamətdə UNEC ilə əməkdaşlıqda maraqlı olduqlarını bildiriblər. 3 gün davam edən Avrasiya Ali Təhsil Zirvəsində beynəlmiləlləşmə, təhsil siyasəti, tələbə mübadiləsi proqramları, regional təlim strategiyaları, meyllər və imkanlar müzakirə olunub, ikitərəfli danışıqlar aparılıb.

“EURIE-2018” zirvə toplantısı Avrasiya Universitetlər Birliyinin təşkilatçılığı və Türkiyə Xarici İqtisadi Əlaqələr Qurumunun dəstəyi keçirilib.

Вся лента