Salyanda içməli su şəbəkəsi yenidən qurulur

02.08.2022,16:36


2 avqust, Fineko/abc.az. “Azərsu” ASC Salyan şəhərində içməli su şəbəkəsinin yenidən qurulması işlərini davam etdirir.

ABC.AZ quruma istinadən xəbər verir ki , 2016-cı ildə Şirvan-Muğan qrup su kəmərindən Salyan şəhərinə 9 km uzunluğunda yeni xətt çəkilərək şəhər şəbəkəsinə birləşmə verilib. Bundan sonra mərhələlərlə şəhərin içməli su şəbəkəsinin  yenidən qurulmasına başlanılıb. Ötən müddətdə Salyan şəhərinin və şəhər mərkəzinə yaxın Babazanlı və Gilan  yaşayış massivlərində içməli su şəbəkəsi yaradılıb. Hazırda şəhərin digər ərazilərində içməli su şəbəkəsinin tikintisi davam etdirilir.

İndiyə qədər Salyan şəhərində inşası nəzərdə tutulan 139 km içməli su şəbəkəsinin 125 kilometrlik hissəsi tikilib. Şəbəkənin qalan hissəsinin tikintisi isə ilin sonunadək tam başa çatdırılacaq.

Layihəyə əsasən Salyan şəhərində 123 km tullantı su şəbəkəsinin yaradılması nəzərdə tutulub. Ötən müddətdə şəhərin mərkəzi hissəsində 5 km kanalizasiya şəbəkəsi yaradılıb, mövcud kanalizasiya nasos stansiyası bərpa edilib və 4,7 km uzunluğunda təzyiqli kanalizasiya xətti yenisi ilə əvəz olunub. Tullantı su şəbəkəsinin yenidən qurulması işləri mərhələlərlə davam etdiriləcək.

 Salyan şəhərində yaranan tullantı sularının təmizlənib zərərsizləşdirilməsi məqsədilə gələcəkdə məhsuldarlığı sutkada 10 min kubmetr olan tullantı sutəmizləyici qurğu tikiləcək. Salyan şəhərinin içməli su təchizatı və kanalizasiya sistemlərinin yenidən qurulması layihəsindən 2035-ci ilə perspektiv inkişaf nəzərə alınmaqla 35 min nəfər sakin faydalanacaq.