Qarajda qalmış "BakuBus" avtobusları niyə xəttə buraxılmır?

27.09.2022,11:34


27 sentyabr, Fineko/abc.az  Son zamanlar cəmiyyətdə bir fikir formalaşıb ki, "BakuBus" avtobusları qarajda saxlanır, xəttə buraxılmır.

ABC.AZ xəbər verir ki, İTV-də yayımlanan "Sabaha saxlamayaq" verilişində qonaq olan BNA İdarə Heyəti sədrinin müşaviri Faiq Abbasov məsələyə aydınlıq gətirib. O qeyd edib ki, bu, qrafikdən yayınma halı deyil, bu, qrafiklərə əməl olunmasının mümkünsüzlüyü halıdır.

"Ötən il bağlanmış müqavilə çərçivəsində 320 yeni avtobus ölkəyə idxal olunub. Bu sahəyə dövlətin dəstəyinin növbəti addımı idi. Görüntülərdəki avtobusların bir qismi yeni alınmış avtobuslardır. Avtobuslar idxaldan sonra istismara hazırlıq dövrünü keçməlidir. Xəttə çıxan avtobusların sayında çatışmazlıq var. Biz bunu gizlətmirik. Lakin göstərilən həcmdə deyil.

Bu dəqiqə 2 minə yaxın avtobus şəbəkə üzrə marşrutların hərəkətini təmin etməyə kifayət edir. Amma həmin qrafikdən kənarlaşmalar da var", - deyə BNA rəsmisi əlavə edib.

Müəllif: Elmir Murad