14:46 - 18 Yanvar 2023

---

18 yanvar, Fineko/abc.az. Qazaxıstan hökuməti əcnəbilərin respublikaya gəlişi və qalma qaydalarına dəyişiklik edib.

ABC.AZ xəbər verir ki, yeni prosedur 2023-cü il yanvarın 27-dən qüvvəyə minəcək.

Avrasiya İqtisadi İttifaqına (Aİİ) üzv olan ölkələrin vətəndaşları indi Qazaxıstanda 180 gün ərzində 90 gündən çox qala bilməz.

Belə ki, hökumət xaricə gedib yenidən qayıtmaqla ölkədə qeyri-leqal  qalma müddətinin uzadılması imkanını - qondarma vizaranı ləğv edib. Qazaxıstan Daxili İşlər Nazirliyi qeyri-qanuni miqrasiya ilə mübarizə üçün 2022-ci ilin noyabrında bu təcrübədən imtina etməyi təklif edib.

Yeni qaydalarda göstərilən müddət keçərsə, ölkəni tərk etmiş əcnəbinin ölkəyə girişinə icazə verilməyəcək. Qeyd olunur ki, yeni qaydalar müvəqqəti yaşamaq icazəsi olanlara şamil edilmir.