16:28 - 31.03.2023

---

31 mart, Fineko/abc.az. Azərbaycanda qızıl hasilatı ilə məşğul olan Böyük Britaniyanın “Anglo-Asian Mining Plc.” şirkəti 2024-cü ildə “Zəfər” qızıl-mis yatağında hasilata başlamağı planlaşdırır.

ABC.AZ xəbər verir ki, bu barədə şirkətdən məlumat verilib.

Qeyd edək ki, “Zəfər” mədəni 2023-cü ildə inşa ediləcək, istehsal 2024-cü ilə planlaşdırılıb. “Zəfər” “Gilar” yatağında yüksək qızıl və mis tərkibli filiz hasilatında gecikmə və ya fasilə yarandığı zaman ehtiyat istehsalı təmin edəcək. “Zəfər” yatağının ehtiyatları 6,8 milyon tondur.

2023-cü ildə “Anglo Asian Mining” qiymətli metal hasilatını 50-54 min unsiya qızıl ekvivalentində proqnozlaşdırır. Bundan başqa, şirkət bu il qızıl hasilatını 30 min unsiyadan 32 min unsiyaya qədər, mis hasilatını 4,1 min tondan 4,3 min tona qədər həcmdə gözləyir.