15:34 - 26.05.2023

---

26 may, Fineko/abc.az. Bu ilin birinci rübündə Şərqi Zəngəzur iqtisadi rayonu üzrə əsas kapitala 664 milyon 91,9 min manat vəsait yönəldilib.

ABC.AZ İnterfaks-a istinadən xəbər verir ki, bəhs olunan məbləğin də 657 milyon 370,4 min manatı tikinti-quraşdırma işlərinin yerinə yetirilməsinə sərf olunub. Hər iki göstərici ötən ilin yanvar-mart ayları ilə müqayisədə müvafiq olaraq 3,3 və 3,2 dəfə artıb.

Qeyd olunan vəsaitin böyük hissəsi - 236 milyon 167,7 min manat (Şərqi Zəngəzur üzrə əsas kapitala yönəldilən vəsaitin 35,5%-i) Kəlbəcər rayonuna yatırılıb. Laçın rayonu üzrə vəsait qoyuluşu 204 milyon 350,3 min manat, Cəbrayıl rayonu üzrə 108 milyon 782,6 min manat məbləğində olub.

2023-cü ilin yanvar-mart aylarında Azərbaycanda əsas kapitala 3 milyard 538 milyon 110,2 manat məbləğində və ya 2022-ci ilin I rübü ilə müqayisədə 40,9% çox vəsait yönəldilib.*

Qeyd edək ki, 2022-ci ildə Qarabağ və Şərqi Zəngəzur iqtisadi rayonlarının inkişafına ümumilikdə 4 milyard 18 milyon 769,9 min manat (cari məzənnə ilə təxminən $2,4 milyard) investisiya yatırılıb ki, bu da 2021-ci ilin göstəricisindən 1,8 dəfə çoxdur.