15:34 - 3.10.2023

---

3 oktyabr, Fineko/abc.az. “Israel Aerospace Industry” şirkətinin gələn il orbitə çıxaracağı “Azersky-2” – yerin məsafədən müşahidə peyki 200 kiloqram ağırlığa malikdir, 7 il fəaliyyətdə olacaq.

ABC.AZ Report-a istinadən xəbər verir ki, peyk fəaliyyət göstərmək üçün minimum 5 km hündürlükdə olmalıdır.

Onunla 600 km hündürlükdən uzunluğu 9 km-ə, eni isə 6 km-ə qədər fotolar çəkmək mümkündür. Bunun üçün istehsal adı “OPTSAT 500” olan mikro peykin aşağısına 50 sm diafraqmalı 2 kamera quraşdırılıb. Peykin məlumat yaddaşı 6 TB müəyyən edilib. Qurğu saniyədə 1 GB ölçüdə material ötürə biləcək.

İsrail şirkətinin peyklə bağlı şərhində deyilir ki, “OPTSAT 500” 40 illik kosmik mükəmməlliyə əsaslanır: “Bu, yüksək keyfiyyətli təsvirlər, geniş əhatə dairəsi və sərfəli paketdə optimal performans təmin edən mikro peykdir. “OPTSAT 500”ün avionikası və faydalı yükləri şirkətin geniş kosmik irsinə, sübut edilmiş kosmik məhsullarına əsaslanır və bu, onu bu günə qədər ən yaxşı kosmik təsvir platformalarından birinə çevirir”.