17:29 - 6.06.2024

---

6 iyun, Fineko/abc.az. Amerika Birləşmiş Ştatlarının 30 komandadan ibarət olan peşəkar basketbol liqası NBA – televiziya yayım müqavilələrindən nəhəng məbləğlər qazanacaq.

ABC.AZ xəbər verir ki, liqanın rəhbərliyi yayım müqavilələrinin 11 il ərzidə 76 milyard dollar qazanc gətirəcəyini gözləyir.

Amerikanın kommersiya yayım televiziya şirkəti olan NBC hər il orta hesabla 2,5 milyard dollar ödəmək üçün NBA ilə razılaşmaya hazırdır. Müqaviləyə əsasən, hər mövsüm təxminən 100 matç yayımlanacaq və bu matçların yarısı eksklüziv olaraq şirkətin “Peacock” platformasında göstəriləcək.  NBC-nin “Bazar Gecəsi Futbolu” proqramı ilə ziddiyyət təşkil etməmək üçün oyunlar çərşənbə axşamı və bazar günləri NBC-də yayımlanacaq. Bu razılaşma onu göstərir ki, NBC basketbol matçlarını həm televiziya kanalında, həm də rəqəmsal platformasında yayımlamaqla auditoriyasını genişləndirməyi hədəfləyir.

Amazon-un 1,8 milyard dollarlıq illik paketinə adi mövsüm və pley-off oyunları, yeni NBA mövsümi turniri və “play-in” oyunları daxildir.

Disneyin NBA paketini saxlayacağı və NBA Finallarını yayımlamağa davam edəcəyi və mövcud razılaşmaya görə 1,5 milyard dollar olan ödənişlərin ildə orta hesabla 2,6 milyard dollara qalxacağı bildirilir.

Müqavilələr 2024-2025 mövsümündən sonra qüvvəyə minəcək.