17:27 - 12.09.2024

---

12 sentyabr, Fineko/abc.az. “Amazon”un qurucusu Ceff Bezos hakim qarşısına çıxacaq.

ABC.AZ xarici mətbuata istinadən xəbər verir ki, buna səsəb kimi, onun Mayamidəki “Indian Creek” adasında “milyarderlərin sığınacağı” adlandırılan yeddi otaqlı evin qiymətini müzakirə edərkən kimliyini gizlətməsi göstərilir.

Belə ki, Bezos şəxsiyyətini gizlətməklə 6 milyon dollar endirim əldə edib.

Bu endirim 190 milyard dollarlıq sərvəti olan Bezos üçün kiçik məbləğ olsa da, Braziliyanın oyuncaq və elektronika şirkəti “Tectoy”un həmtəsisçilərindən olan Leo Kryss iddia edilən aldadıcı hərəkəti müsbət qarşılamayıb.

“The Wall Street Journal”a görə, Kryss, əməliyyatın hər iki tərəfini idarə edən daşınmaz əmlak brokeri Duqlas Ellimanı məhkəməyə verir və Bezosun alıcı olduğunu bilsəydi, evini tam qiymətə sata biləcəyini iddia edir. Kryss şərab zirzəmisi, kitabxanası və teatr zalı olan evini 2023-cü ilin may ayında 85 milyon dollara siyahıya alıb.

Bezosun qonşuluqdakı mülkü üçün 68 milyon dollar ödədikdən az sonra onun evinə təklif gələndə Kryss bu təklifin arxasında milyarderin olduğundan şübhələnib. Lakin Duqlas Ellimanın əməkdaşı telefonla Kryssi bunun belə olmadığına inandırıb və əlavə edib ki, alıcı əmlak üçün 79 milyon dollardan çox pul ödəməyəcək. Kryss razılaşmanı qəbul edib, lakin sonradan öyrənib ki, o, həqiqətən də evini Bezosla əlaqəli bir quruma satıb.