16:54 - 13.02.2026

---

13 fevral, Fineko/abc.az. Cümə günü qızılın qiyməti həftəlik minimumdan bərpa olunaraq 1%-dən çox artıb.

ABC.AZ xəbər verir ki, artım qiymət enişindən istifadə edərək alış edən investorlar tərəfindən dəstəklənib.

Spot qiymət unsiya üzrə 4 969,85 dollara (+1%), ABŞ-da fyuçerslər isə 4 990,30 dollara (+0,9%) yüksəlib. Əsas impuls Yeni Ay ili ərəfəsində Çində yüksək tələbat fonunda Asiya bazarlarından gəlib. Hindistanda isə dəyişkənlik səbəbindən qızıl son bir ayda ilk dəfə endirimlə ticarət olunur.

Bundan əvvəl metal ABŞ-ın əmək bazarı üzrə güclü göstəricilərindən sonra təxminən 3% ucuzlaşmışdı ki, bu da Federal Ehtiyat Sisteminin siyasətinin tezliklə yumşaldılacağı ilə bağlı gözləntiləri azaldıb. Hazırda investorların diqqəti tənzimləyicinin növbəti qərarlarına təsir göstərə biləcək inflyasiya göstəricilərinə yönəlib.