11:57 - 17.02.2026

---

17 fevral, Fineko/abc.az. Böyük Britaniya bankları 19 fevral tarixində Visa və Mastercard sistemlərinə milli alternativin yaradılması ilə bağlı ilk iclas keçirəcəklər. Təşəbbüs Donald Tramp administrasiyasının NATO müttəfiqlərinə qarşı mümkün addımları ilə bağlı narahatlıqlar fonunda irəli sürülüb.

ABC.AZ xəbər verir ki, bu barədə The Guardian yazır.

Görüş Barclays bankının Böyük Britaniya bölməsinin rəhbəri Vim Marunun təşəbbüsü ilə çağırılıb. Layihəni maliyyələşdirəcək DeliveryCo adlı yeni operator yaradılacaq. Layihədə həmçinin Santander UK, NatWest, Lloyds, Nationwide və Link şəbəkəsi iştirak edir. İngiltərə Bankı texniki bazanı gələn ilə qədər hazırlayacaq, sistemin tam işə salınması isə 2030-cu ilə planlaşdırılır.

Müzakirələrin sürətləndirilməsinə səbəb ABŞ ödəniş sistemlərinin mümkün dayandırılması riski olub: ölkədə kart əməliyyatlarının təxminən 95%-i Visa və Mastercard infrastrukturu üzərindən həyata keçirilir. Risk nümunəsi kimi Rusiya təcrübəsi göstərilir — sanksiyalar nəticəsində kart əməliyyatlarında fasilələr yaranmışdı.

Bundan əvvəl Avropa Ödəniş Təşəbbüsünün rəhbəri Martina Veymert vahid Avropa ödəniş sisteminin yaradılmasının sürətləndirilməsinə və ABŞ-dan asılılığın azaldılmasına çağırmışdı.