15:01 - 3.03.2026

---

3 mart, Fineko/abc.az. 2026-cı ilin yanvarından etibarən İranın ən iri kriptobirjası Nobitex-dən vəsait çıxışı 700% artaraq 3 milyon dollara çatıb.

ABC.AZ xəbər verir ki, kriptovalyutanın əsas hissəsi xarici birjalara və mübadilə məntəqələrinə yönəldilir. Çıxış pikləri kütləvi etirazlar və internet məhdudiyyətləri ilə üst-üstə düşüb, lakin bəzi istifadəçilər aktivlərinə girişlərini qoruyub saxlayıb.

Rial üzərindən ticarət edən və müstəqil (non-custodial) pul kisələrini dəstəkləyən Nobitex beynəlxalq bank məhdudiyyətlərini qismən yan keçməyə imkan verir. 2025-ci ildə platforma vasitəsilə 7,2 milyard dollar əməliyyat keçirilib, istifadəçi sayı 11 milyondan çoxdur. Əməliyyat həcminə görə Nobitex bütün digər İran birjalarını üstələyir. Analitiklər platformanın İran İnqilab Keşikçiləri Korpusunun (İİKK) maliyyə fəaliyyəti ilə əlaqəsini vurğulayır, İran Mərkəzi Bankı rialın məzənnəsini dəstəkləmək üçün platformadan istifadə edib. ABŞ İrana kriptovalyuta çıxışı ilə əlaqəli iki Britaniya birjasına qarşı sanksiyalar tətbiq edib.