14:28 - 6.03.2026

---

6 mart, Fineko/abc.az. Almaniyanın aviasiya qrupu Deutsche Lufthansa AG 2025-ci ildə 39,6 milyard avro (+5%) məbləğində rekord gəlir əldə edib, əməliyyat mənfəəti isə 25% artaraq 2 milyard avroya çatıb. Lakin əməliyyat marjası 4,9% səviyyəsində qalır, xalis mənfəət isə 1,3 milyard avroya enib.

ABC.AZ xəbər verir ki, mənfəətin artmasına kerosin qiymətlərinin azalması və dolların zəifləməsi kimi müvəqqəti amillər şərait yaradıb və bu da şirkətə təxminən 860 milyon avro qənaət gətirib. Bununla belə, əsas brend Lufthansa Airlines cəmi 0,9% əməliyyat marjası göstərib, mənfəətin böyük hissəsini isə Lufthansa Cargo, Lufthansa Technik və ITA Airways bölmələri təmin edib.

Qrupun aviaşirkətləri 135 milyon sərnişin daşıyıb, oturacaq doluluğu isə rekord 83,2% təşkil edib. Rəhbərlik 2026-cı ildə mənfəətin artacağını gözləyir, lakin Yaxın Şərqdəki geosiyasi qeyri-müəyyənlik səbəbindən dəqiq proqnoz vermir.