Yeni SOCAR İstiqrazları 1075 dollardan satıldı

12.11.2021,11:26


12 noyabr, Fineko/abc.az. Bu ilin 2 noyabr tarixində təkrar bazar əməliyyatlarına start verilən və nominal qiyməti 1000 dollar təşkil edən yeni SOCAR İstiqrazlarının Bakı Fond Birjasındakı satış qiyməti 1075 dollara yüksəlib və həmin qiymətdən satış əməliyyatları artıq baş tutub. Xatırladaq ki, 1-ci SOCAR İstiqrazlarının 5 illik tədavül müddəti ərzində müvafiq göstərici maksimum 1050 dollar təşkil etmişdi.

“SOCAR Capital” şirkətindən verilən məlumata əsasən, istiqrazların belə bahalaşmasına başlıca səbəb yüksək tələbat və likvidlikdir. Eyni zamanda, gəlirli və etibarlı maliyyə aləti olması da investorların maraqlarına cavab verən digər mühüm faktorlardır.

İllik 4.5% gəlir gətirən, faiz gəlirləri hər 3 aydan bir ödənilən və 5 illik müddətə buraxılmış yeni SOCAR İstiqrazlarını 1 və 5 saylı “ASAN xidmət” mərkəzlərindən, eləcə də Azərbaycanda fəaliyyət göstərən investisiya şirkətlərindən əldə etmək mümkündür.

100 milyon dollar həcmində buraxılmış bu istiqrazlara tələb abunə yazılışı dövründə 380 milyon dollardan artıq olmuşdu.

Azərbaycan kapital bazarlarında investorların ən çox tələbat göstərdiyi korporativ qiymətli kağız olan SOCAR İstiqrazları üzrə ilk faiz ödənişi 1 fevral 2022-ci il tarixində baş tutacaq. 2026-cı ilədək tədavül müddəti davam edəcək olan yeni SOCAR İstiqrazları, sahiblərinə toplamda 22 milyon 500 min dollar gəlir qazandıracaq.

Açar sözlər: socar