Dövlətə məxsus 50 nəqliyyat vasitəsi özəlləşdirilib - Hərrac

15:02 - 25.11.2021


25 noyabr, Fineko/abc.az.   Əmlak Məsələləri Dövlət Xidməti növbəti dəfə hərrac keçirib.

ABC.AZ xəbər verir ki, hərracda 1 kiçik dövlət müəssisəsi və 50 nəqliyyat vasitəsi özəlləşdirilib. Alıcıların hərraclarda fəallığı prosesi daha da rəqabətli edib. Belə ki, bir lot şəklində hərraca çıxarılan 21 “Tofaş” markalı nəqliyyat vasitəsinin birgə ilkin start qiyməti 37 900 manat olsa da, rəqabət nəticəsində son hərrac qiyməti 63 400 manata yüksəlib. Rəqabətli olması ilə seçilən daha bir nəqliyyat vasitəsi istehsal ili 2007-ci il olan “Hyundai Sonata” markalı avtomobil olub. 5 şəxsin sifarişçi kimi təklif verdiyi hərracda bu nəqliyyat vasitəsinin ilkin start qiyməti 7 000 manat olsa da, 10 300 manata sahibini tapıb.

Özəlləşdirilən kiçik dövlət müəssisəsi isə Şəki rayonunda yerləşən “Əmlak kompleksi”dir. Əmlakın ümumi faydalı sahəsi 2889 kv.m, torpaq sahəsi isə 91 750 kv.m təşkil edir. Özəlləşdirilmiş əmlaklardan 394 155 manat vəsaitin dövlət büdcəsinə daxil olması nəzərdə tutulur.

Bütün xəbərlər