“Kapital Bank” sahibkarlar üçün tədbir təşkil edib - Foto

23.06.2022,13:39


23 iyun, Fineko abc.az. “Kapital Bank” hər zaman sahibkarların daha rahat və fasiləsiz xidmət almaları üçün müxtəlif innovativ və onlayn yeniliklər təqdim edir. Bir neçə yeni xidməti təqdim etmək üçün “Kapital Bank” iyunun 22-də sahibkarları, tərəfdaşları “JW Marriott Absheron Baku Hotel”ə toplayıb. “Məsafə saxlamırıq!” şüarı ilə keçirilən tədbiri keçirməkdə məqsəd yeni onlayn xidmətləri real olaraq nümayiş etdirmək, həmçinin sahibkarları maraqlandıran sualları cavablandırmaq idi.

Tədbiri açılış nitqi ilə “Kapital Bank”ın Korporativ və KOS Satış İdarəsinin Baş Direktoru Fərid Hidayətzadə açıb. O, çıxışı zamanı “Kapital Bank”ın sahibkarlarla əməkdaşlığının inkişafı, görülən işlər, gələcək planlar və bəzi statistik məlumatlar barədə məlumat verib. Sonra isə “Kapital Bank”ın əməkdaşları tərəfindən təqdimatlar keçirilib.

“Kapital Bank”ın KOS və Korporativ bankçılıq sahəsinin kreditləşmə məhsulları üzrə məhsul sahibi Bəhruz Camalov üz tanıma funksiyası ilə müqavilələrin məsafədən imzalanması imkanı, KOS və Korporativ bankçılıq sahəsinin ödənişlər və köçürmələr üzrə məhsul sahibi Rüfət Səbziyev “Müştəri Bank Mobile” tətbiqinin biznes adamlarının gündəlik iş həyatının bir hissəsi olması, KOS və Korporativ bankçılıq sahəsinin POS məhsulları üzrə məhsul sahibi Günel Talıbova rəqəmsal ödənişlərdə yenilik olan “Mobile POS” məhsulu barədə, KOS və Korporativ bankçılıq sahəsinin açıq bankçılıq və B2B inteqrasiyalar üzrə məhsul sahibi Cavidan Alıcanov isə açıq API portalının sahibkarların işinin asanlaşdırılması imkanı haqqında ətraflı məlumat verib.

Rəsmi hissə bitdikdən sonra foyedə hazırlanan xüsusi stenddə bir neçə yeni onlayn xidmətlərin, həmçinin “Mobil POS”un real həyatda nə cür işləməsi qonaqlara nümayiş olunub və suallar cavablandırılıb.

Qeyd edək ki, “Kapital Bank” mütəmadi olaraq müştərilərə göstərilən xidmətləri və təqdim edilən məhsulların şərtlərini sadələşdirərək məsafədən həyata keçirilməsi üçün müxtəlif yeniliklər təqdim edir. Bununla da müştərilər vaxta qənaət etməklə prosesləri daha sürətli yerinə yetirə bilirlər.

Açar sözlər: Kapital Bank