16:54 - 13.06.2018

---

13 iyun, Fineko/abc.az. Bayram günlərində  dəmir yolunda  sərnişin axını artır, sərnişinlərin əksəriyyəti məhz, rahat və sərfəli nəqliyyat vasitəsi olan dəmir yolu nəqliyyatına üstünlük verir.

“Azərbaycan Dəmir Yolları”  QSC-in məlumatında deyilir ki, bununla bağlı Sərnişin daşımaları Departamentinin kollektivi  Ramazan bayramı günlərində (14-19 iyun) gücləndirilmiş iş rejimində çalışacaq.

Sərnişin qatarlarında xidmət mədəniyyətinin səviyyəsinin daha da yüksəldilməsi üçün bütün qüvvələr səfərbər olunub. Həmçinin, bayram günlərində sərnişin axınının artması ilə bağlı ölkə daxilində hərəkət edən sərnişin qatarlarına gündə təxminən 15 əlavə vaqon birləşdiriləcək.

Bir daha sərnişinlərin nəzərinə çatdırırıq ki, sərnişin qatarlarına bilet satışı 10 gün qabaqcadan, əlavə vaqonlara isə bilet satışı həmin vaqon qatara qoşulan gün həyata keçirilir.