330x100
 

Daha 5 ekspress xətti yaradılır – Sərnişin sıxlığı azaldılır

05.08.2020,17:30


5 avqust, Fineko/abc.az. Xüsusi karantin rejiminin yumşaldılması ilə əlaqədar artan sərnişin tələbatının qarşılanması məqsədilə 5 sayda əlavə ekspress xətt təşkil edilir.

Bakı Nəqliyyat Agentliyindən ABC.AZ-a bildirilib ki, bu ekspress xətlər üzrə də avtobusların iş qrafiki saat 06:30-dan 21:00-dək olmaqla müəyyən edilib.

Ekspress xətlər qarşıdakı günlərdə mərhələ ilə fəaliyyətə başlayacaq. M1 A və M2 A xətti üzrə gediş haqqı 0.30, M8 xətti üzrə 0.40, M9 və M10 xətləri üzrə isə gediş haqqı 0.50 azn müəyyən edilib.

Təşkil olunacaq ekspress xətlərin istiqamətlərinə gəldikdə isə M1 A xətti Q.Qarayev prospekti (Laçın ticarət mərkəzinin qarşısı) – Gənclik metro stansiyası, M2 A xətti Neftçilər metro stansiyası – Elmlər Akademiyası metro stansiyası, M8 xətti Maştağa qəsəbəsi – Gənclik metro stansiyası, M9 xətti “Sea Breeze” istirahət mərkəzi – N.Nərimanov metro stansiyası, M10 xətti isə Mərdəkan qəsəbəsi (stansiya) – N.Nərimanov metro stansiyası üzrə marşrutu əhatə edəcək.