11:06 - 8.06.2023

---

8 iyun, Fineko/abc.az. Son bir neçə ay ərzində generativ neyron şəbəkələr və onlar üzərində qurulmuş çat-botlar çox populyarlaşıb, ona görə də təəccüblü deyil ki, bir çox böyük İT şirkətləri bu cür alətləri öz məhsullarına inteqrasiya etməyə çalışırlar.

Onlayn mənbələrə görə, süni intellekt botu tezliklə “Instagram” sosial şəbəkəsində görünə bilər.

Qeyd edilir ki, bu bot fərdiləşdirilmiş parametrlər alacaq, beləliklə, platformanın istifadəçiləri onu öz seçimlərinə uyğun olaraq fərdiləşdirə biləcəklər.

“Instagram”da süni intellekt botundan istifadə etmək imkanı mətn mesajları yazmaqda çətinlik çəkən insanlar üçün faydalı ola bilər. Həmçinin güman edilir ki, alqoritm digər istifadəçilərlə söhbət zamanı istifadə oluna bilər. Generativ neyron şəbəkəyə əsaslanan çat-botun “Instagram”da nə vaxt görünə biləcəyi hələlik məlum deyil.