330x110
 

Azərbaycanda gizli fəaliyyət göstərən bank aşkarlandı – Baş Prokurorluq işə qarışdı

12.11.2019,10:39


12 noyabr, Fineko/abc.az. Azərbaycanda faktiki olaraq bank fəaliyyəti ilə məşğul olan, amma gizli işləyən maliyyə qurumu aşkar edilib.

ABC.AZ xəbər verir ki, Baş Prokurorluğun mətbuat xidmətindən verilən məlumata görə, Korrupsiyaya Qarşı Mübarizə Baş İdarəsinə daxil olmuş məlumatlar əsasında həyata keçirilmiş əməliyyat-istintaq tədbirləri ilə qanunsuz pul köçürmə fəaliyyəti ilə məşğul olan şəbəkə aşkar edilib.

Dövlət qeydiyyatına, yəni vergi uçotuna alınmadan və lisenziyasız fəaliyyət göstərən şəbəkə pul vəsaitlərinin müəyyən xidmət haqqı müqabilində qanunsuz olaraq ayrı-ayrı şəxslərdən qəbul edilməsi və həmin şəxslərin sifarişi ilə üçüncü şəxslərə təhvil verilməsi üzrə xidmət göstərirmiş. Şəbəkənin əsas fəaliyyəti Azərbaycanla-Türkiyə arasında pul köçürmələri olub.

Həyata keçirilmiş əməliyyat-istintaq tədbirləri zamanı məlum olub ki, İskəndərov Rəşad İmran oğlunun rəhbərlik etdiyi şəbəkə 2018-2019-cu illər ərzində faktiki şəkildə bank fəaliyyəti ilə məşğul olub. O, Mustafa Kılıç Murat oğlu və digər bir qrup şəxslərlə əlbir olaraq Bakının Binəqədi rayonu ərazisində yerləşən ofis yaradıb. Ofisdə gizli formada qeydiyyat və mühasibatlıq aparmaqla ona müraciət edən ayrı-ayrı şəxslərdən aldığı müxtəlif məbləğlərdə pul vəsaitini Türkiyə Respublikasındakı şəxslərə təhvil verilməsi xidməti təşkil edib. Eləcə də, əks istiqamətdə – Türkiyədə fəaliyyət göstərən belə qruplar tərəfindən qəbul edilmiş pul vəsaitlərinin Azərbaycanda ayrı-ayrı şəxslərə çatdırılması ilə məşğul olub. 2 ildən az müddət ərzində şəbəkə Azərbaycandan Türkiyəyə və əks istiqamətdə 88 milyon 744 min ABŞ dolları və 6 milyon 110 min avro, yəni ümumilikdə 162,7 milyon manatlıq məbləğlər köçürüb. İki ölkə aramsında 14 min 553 dəfə pul köçürməsi edilib. İstintaq müəyyən edib ki, bu qanunsuz əməliyyat nəticəsində şəbəkə sahibləri 1 milyon 344 min manat məbləğində gəlir əldə edib.

 

Müəllif: Elmir Murad